دستور الرجوله - الشريف بركات الهاشمي

[ابو عيد]

من اشهر القصائد على مستوى الجزيره العربيه

الشريف بركات حاكم الحجاز قبل الحكم السعودي

له قصيده اطلق عليها الرواه اسم ( دستور الرجوله )

وينصح فيها ابنه مالك .. يقول :


يا مرقب بالصبح ضليت اباديك …. ما واحد قبلي خبرته تعلاك

وليت يا ذا الدهر ما اكثر بلاويك … الله يزودنا السلامه من اتلاك

يللي على العربان عمت شكاويك … وليت يا دهر الخطا ول مقواك

واليوم هالكانون غادي شبابيك … تلعب به الارياح من كل شباك

يا مالك اسمع جابتي يوم اوصيك … واعرف ترى يا بوك بامرك وانهاك

وصية من والد طامع فيك … تسبق على الساقه لسانه لعلياك

اوصيك بالتقوى عسى الله يهديك … لها وتدركها بتوفيق مولاك

الله بحق اجدادك الغر يعطيك … رضاه مع كل ما تمنى من امناك

احفظ دبشك اللي عن الناس مغنيك … اللي الى بان الخلل فيك يرفاك

واعرف ترى مكه ولاها بناخيك … لو تطلبه خمسة دواوين ما اعطاك

اجعل دروب المرجلة من معانيك … وادراج سيسها على العز مرقاك

لا تنسدح عنها وتبغيني اعطيك … جميع ما يكفيك ما حاصل ذاك

احذر امر ليعات تبيها لتاليك … ايضا ويرخص عندها قدر مأواك

ادب ولدك ان كان تبغيه يشفيك … واستسعفه من بعد مرباه يالاك

اما سمج واستسمجك عند شانيك … ويفر من فعله صديقك وشرواك

والا بعد جهله ترا هو بياذيك … لو زعلت امه لا تخليه يالاك

واحذر تضيع كل من هو ذخر فيك … معروفه لا تنساه واوفه لعرفاك

ترا الصنايع بين الاجواد تشريك … الى طمعت بركزها لا تعداك

واحذر سرور بغبة البحر يرميك … ولا عنده افلس من تشكيك وبكاك

واوف الرجال حقوقها قبل تعنيك … لا تعتمد بالعفو فالحق يقفاك

وهرج النميمه والقفا لا يجي فيك … واياك وعرض الغافل اياي واياك

تبدي حديث للناس فيه تشكيك … وتهيم عند الناس بالكذب واشراك

واذا نويت احذر تعلم بطاريك … كم واحد تبغي به العرف واغواك

واحذر شماتة صاحب لك مصافيك … والى جرا لك جاري قال لولاك

ولا تحسب ان الله قطوع يخليك … ولا تفرح ان الله على الخلق بداك

ان اشتهى حط الطمع في تواليك … لو ما لقيته يا فتى الجود يلقاك

والضيف قوم له حين يلفيك … مما تنوشه يا فتى الجود يمناك

اكرم قباله فانها من شواديك … وابذل له المجهود ما دام يعناك

واحذر تلاقي الضيف مقرن علابيك …خله محب لك صديق اذا جاك

واوصيك زلات الصديق ان عثا فيك … ما دام يغطاها الشعر فاحتمل ذاك

راعه ولو ما شفت انه يراعيك … عساك تكسر نيته عن معاداك

واحذر عدوك لو ظهر بيصافيك … خلك نبيه وراقبه وين ما جاك

لا تامنه فاطلب من الله ينجيك … ويكفيك ربك شر ذولا وذولاك

شفني انا يا بوك بآ مرك وانهاك … عن التعرض بين الاثنين حذراك

اذا حضرت طلايب مع شرابيك … اسع لهم بالصلح واللاش يفداك

ابذل لهم بالطيب ربك ينجيك … ولا تجضع الميزان مع ذا ولا ذاك

اما الشهادة ادها ان دعوا فيك … بين عمود الدين لا عميت ارياك

بالك تماشي واحد لك يرديك … طالع بني جنسك وفكر بممشاك

رابع اصيل في زمانك يشاكيك … والى شاف خملاتك عن الناس غطاك

واحذر عن طرد المجفي حذاريك … عليك بالمجبل وخل من تعداك

ثم العن الشيطان لياه يغويك … ترا ان تبعته للشرابيك وداك

واوصيك لا تشتكي علينا بلاويك … انت السبب اخذك عيونك بيمناك

واعرف ترا اللي وطا الفهر واطيك … ولا انت اعز من الجماعة هذولاك

المسك يا راسي عن الذل واخطيك … واحذر تكلم يا لساني حذاراك

والطف بجارك ثم قم دون عانيك … وافطن الما يعنيك عن ربعة اخواك

يا ذيب وان جتك الغنم في مفاليك … ياذيب وان جتك الرعايا اتعداك

من اول يا ذيب تفرس بياديك … واليوم جا ذيب عن الفرس عداك

يا ذيب عاهدني واعاهدك ما رميك … ما رميك انا يا ذيب لو زان مرماك

والنفس خالف رايها قبل ترميك … ترا لها الشيطان يرمي بالاهلاك

ومن بعد ذا لا تصحب النذل يعديك … وعن صحبة الانذال حاشاك حاشاك

ترا العشير السوء يخلف طواريك … وانا ارجي انك ما تجي دون آباك

والهقوة انك ما تجي دون اهاليك … ولا اظن عود الورد يثمر بتنباك

والحر مثلك يستحي يصحب الديك … وان صاحبه عاعا معاعات الادياك

لا تستمع قول الطرف يوم يلفيك … بالكذب يقضي حاجته كل ما جاك

من نم لك نم بك ولا فيه تشكيك … ويلاه قد ازرا رفيقك وازراك

عندك حكا فينا وعندي حكا فيك … واصبحت كارهنا وحنا كرهناك

ما اخطاك ما صابك ولو كان راميك … واللي يصيبك لو تتقيت ما اخطاك

مير استمع مني عسى الله يهديك … النصح يا مالك لك الله مولاك

عندي مظنه ما تمثلتها فيك … واطلب لك التوفيق من عند مولاك





------